Ody am-bavafo: mofo laisoa tsotra sy haingana

Salama tompoko,

Faly aho fa tafeverina eto amin'ity sehatra iray mampitombo lanja ity. Efa elaela izay satria ny adidy aman'andraikitra betsaka nefa tsy manadino antsika rehetra tia sy manaraka ity blog ity sanatria. Ody am-bavafo, mety hanina amin'ny 10ora maraina na ilay amin'ny 4ora hariva iny indray no hozaraiko anio: mofo laisoa.

Raha ny faniriana dia toy ireny eny an-tsena ireny, sady tsara hendrika no matsiro dia matsiro no natao saingy mbola bado ny tenako amin'ny resaka lakozia ka zavatra tsotsotra ihany aloha no atao. Ny hendriny aloha tamin'ity indray mitoraka ity tsy dia lafatra fa ny tsiro no nakafizin'ny rehetra dia efa faly ny mpahandro.

 

Ny zavatra ilaina:

• Laisoa
• Lafarinina
• Atody
• Sira
• Levure
• Dipoavatra
• Menaka

Ny fikarakarana azy:

Tetehina madinika ny laisoa dia sasàna tsara. Omanina ny pâte à beignet ka araka izay efa mahazatra anao anaovana azy. Izaho manokana tsy dia manisy fatra fa alefako anjambany. Ka ny atody no kapohiko voalohany ao anaty vilia jobo. Avy eo araraka ny lafarinina. Tsy atao be loatra fa atao izay mandon'ilay atody ihany. Afangaro dia ampiana rano kely mba hanome paty madity fa tsy miranoka loatra. Tsikaritro fa raha miranoka loatra ny paty dia mifoka menaka be ka maha monamonaina. Aroana tsara mba tsy hisy ilay mamatovato.

Rehefa izay dia asiana levure iray sotro kely, sira ary dipoavatra araka izay tiana. Afangaro tsara indray dia alefa ao ny laisoa voatetika. Afangaro tsara dia afaka endasina amin'ny menaka mafana. 

Misaotra anao namaky
Mazotoa homana tompoko

Matsiro rehefa avy any ambanivohitra

Salama tompoko,

Mahagaga ahy fa tena tiako ny sakafo rehefa avy any ambanivohitra. Na sakafo fahita eto Antananarivo aza dia toa hafa foana ny tsirony. Izay angamba ilay hoe izay tiana mitombo tarehy. Faly be ary aho androany fa tonga vahiny avy any ambanivohitra ka nahazo voan-dalana maromaro. Ireto amin'ny sary ireto ihany no azoko sary ka tsy inona izany fa voatavo, voanjobory ary trondro. Ireo tondro lehibebe hono handrahoina dia ireo majinika hendasina. Efa ato am-bavako sahady ny tsirony.

Ankoatra ireo dia nitondrany ravim-boatavo koa, voatabia, akondro, katsaka efa masaka (katsaka amin'ny taolany sy solo-volo) ary menakely. Faly aho, tena faly hihihi Faly amin-kanina hoy ilay fiteny izay.

Ianareo koa ve mba manao toa ahy? Inona ny sakafo avy any ambanivohitra tena tinareo?

Misaotra anao namaky,
Mandra-piresaka tompoko

Lasopy legioma sy silamangany

Salama Tompoko,

Ahatsiarovako fotoana mamy maro teo anivon'ny fianakaviako ny lasopy silamangany. Sakafon'ny ririnina izy ity. Rehefa mamirifiry ny hariva dia mivory ny mpianakavy fa hakafy ilay lasopy efa niketrika ela teo ambony fatana. Lasopy silamangany nampiarahina amin'ny legioma maromaro no resahako eto.Tsy dia misy fika manokana ny fandrahoana azy ity fa dia alefa araka izay tiana fotsiny.

Manimanina lasopy silamangany mafy aho vao haingana ka nikarakara na dia mafana be aza ny andro eto Madagasikara amin'izao fotoana izao. Nohanina hariva izy ity ka teo ihany ilay "ambiance" na tsy ririnina aza. Ao ny mihinana azy amizao, ao ny mihinana azy amin'ny vary, ao ny maka mofo dipaina kely. Samy manao izay tiany ary tsy misy bedy.

Ireo zavatra ilaina:

• Silamangany (tongotr'omby)
• Karaoty
• Ovy
• Korzety
• Poireaux
• Sira

Ireo no fampiasako fa mahazo namampy izay fangaro tiany ny rehetra.

Fikarakarana azy:

Sasàna madio ny silamangany. Matetika izy ity efa tetehin'ny mpivaro-kena vaventy ka ajanoko amizao ny tetika satria rehefa masaka izy miraraka fotsiny.

Diovina koa ny legioma rehetra ka tetehina vaventy.

Arotsaka anaty vilany izy rehetra dia asiana sira.

Mora malemy kokoa ny silamangany raha cocotte minute no handrahoana azy fa raha vilany tsotra moa dia miomàna fa elaela mihintsy vao malemy izy ity. Dia miady mafy ny saribao raha tsy te handany entona fandrehitra isika.

Rehafa masaka dia aroso mafana. Matsiro ery ny rony sy ilay taolam-pifika iny. Isika samy isika ihany ny eo an-dantabatra ka aza misalasala mandray ny taolana an-tanana e!

Mbola tsy tena malemy izy ity no nalaiko sary mba hivoaka tsara amin'ny sary ireo legioma fa rehefa masaka izy dia mirara-kopana, malemy tsara avokoa.

Misaotra anao namaky
Mazotoa homana Tompoko

Sakafo tian'ny ankizy: paty, hena baolina, lasaosy voatabia sy fromazy

Salama tompoko

Faly mirahaba antsika mpanaraka ity blog ity ary mirary soa hoan'ny taona 2015. Ataoko fa tsy tara loatra izany firariantsoa izany na dia efa mifarana sahady aza ity ny volana janoary.
Sakafo mora atao no entiko anio. Izaho moa manan-janaka ka matetika dia izay sakafo tian'izy ireo no atao mba hampazoto homana azy. Androany dia paty (spaghetti), henabaolina ary lasaosy voatabia nasiana fromazy no nataoko.

Ireo zavatra ilaina:

• Paty
• Toto-kena
• Voatabia
• Fromazy La vache qui rit 
• Menaka
• Dibera kely
• Sira

Toy ny mahazatra moa dia tsy misy fatrany tsy maintsy arahina fa araka ny isan'ny olona hiaraka homana no hanaovana azy.

Ny fikarakarana azy:

• Andrahoina toy ny mahazatra ny paty dia tsihifina anaty passoire sady ampandalovina rano mangatsiaka.
• Asiana sira ny toto-kena dia volavolaina boribory.
• Endasina ireo hena baolina. Ny fomba fanaovako azy dia asiako rano sy menaka kely ao anaty lapoaly dia alefa ao ireo hena baolina. Rehefa ritra ny rano dia manendy azy ny menaka. Amin'izay masaka tsara ny any anatiny any sady mendy sy menafify ny ety ivelany. Rehefa masaka dia esorina eo ambony afo.
• Voasana ireo voatabia dia esorina ny voany ary tetehina madinika. Asiana menaka kely ao anaty lapoaly dia alefa ao ny voatabia. Avela ho mendy sady potserina amin'ny fourchette ka rehefa lasa lasaosy tsara dia asiana fromazy ka potserina amin'ny fourchette koa ity farany. Afangaro tsara dia asiana sira kely raha tsy tian'ny ankizy ilay tsiro somary mamin'ny voatabia.
• Maka lapoaly hafa indray ka asiana dibera kely. Endasina kely ao ny paty. Arona tsara dia vita.

Vita sahady ny sakafotsika. Tsy afangaro izy rehefa aroso mba ho manjamanja ny sary hihi fa rehefa hihinana dia afangaro tsara daholo.


Misaotra anao namaky
Mazotoa homana tompoko

Andrana henabaolina sinoa (boulettes chinoises)

Salama tompoko

Isany zavatra niriako atao efa ela ny henabaolina sinoa na boulettes chinoises fa androany moa vao tena nanandrana.

 Ny zavatra ilaina:

• Totokena
• Lafarinina (mitovy lanja amin'ny totokena)
• Sira
• Poivre
• Kotomila
• Tongolo lay
• Tongolo be

 Ny fikarakarana azy:

Voasana ny tongolo dia tetehina majinika.Alefa ao anaty mixer ny fangaro rehetra ankoatra ny lafarinina dia potehina (mixer-na) Rehefa izay dia alefa ny lafarinina. Mampangotraka rano (ny ahy nasiako sakamalao mba aha-manimanitra azy) Rehefa mangotraka ny rano dia volavolaina amin'ny sotro ilay fangaro mba hanome boribory araka izay refiny mety amin'ny tsirairay. Alatsaka ao anaty rano mangotraka dia avela ho masaka. Mitsingevana izy rehefa masaka. Rehefa vita izay dia izay tiana na hendasina amin'izao na manao saosy voatabia (voatabia, tongolo, persil) Ny ahy moa teto natao laoka dia ilay saosy voatabia no mety kokoa.

Mazotoa homàna
Mandra-piresaka tompoko

Goûter#004: flan mora atao

Salama tompoko

Handrana voalohany ity tamin'ny fanaovana flan. Nitady ny fomba faran'ny tsotra tamin'ny internet satria izay angamba no mety hoan'ireo vao manomboka. Faly ery fa nety ity handrana voalohany ity. Ny hendriny aloha tsy tonga lafatra e fa ny tsirony no tena nahafapo.

Ny zavatra ilaina (hoana olona 6)

• Atody 4
• Siramamy 75gr
• Lafarinina 100g
• Dibera 40g
• Ronono 1/2l.

Ny fikarakarana azy

Hafanaina ny lafaoro (200°C). Epoina anaty vilany ny dibera. Maka vilia jobo dia kapohana miaraka ao ny siramamy sy atody. Rehefa mitambatra tsara sady somary levona ny siramamy dia arotsaka ny dibera sy ny lafarinina. Arotsaka koa ny ronono dia afangaro tsara ireo rehetra ireo.Osorana dibera ny lasitra (moule) dia araraka ao ilay fangaro efa vita tetsy ambony. Alefa anaty lafaoro mandritra ny 45min. Afaka aroso rehefa tsy mamay be intsony.

Mafilotra izy ity raha ohanina eo no eo nefa azo tehirizina koa hoan'ny sakafo maraina na ny goûter entina mianatra ny ampitso.

Mazotoa homàna
Mandra-piresaka tompoko

Salady tsotra, sakafo maivana

Salama tompoko,

Kamokamo mivoaka miantsena aho rehefa alatsinainy. Io andro io koa matetika no tsara hihinanana zavatra maivamaivana mba hifandanja amin'ny sakafo ben'ny alahady. Ny alahady moa matetika andron'ny fihaonana amin'ny fianakaviana izay feno sakafo mafilotra. Izany antony rehetra izany no nahatonga ahy hanao ity salady ity. Ny zavatra nanaovana azy rehetra dia ilay antsoina hoe "fond de frigo" Tsy inona izany fa ny atody sy ny legioma. Asa ianareo fa izaho dia mividy legioma sy atody betsaka foana satria maro ny zavatra azo atao amin'izy ireny rehefa maika. Sady maharitra ny fitehirizana azy.

Ny zavatra ilaina:

• Atody
• Karaoty
• Anandrano
• Haricot vert
• Voatabia
• Tongolo be
• Menaka
• Vinaigitra
• Sira
• Dipoavatra

Ny fomba hikarakarana azy:

• Sasàna madio ny legioma rehetra. Momba ny anandrano izay ambolena amin'ny toerana maloto tokoa eto Antananarivo dia tsara angamba ny manafatra anandrano an-tanety (eny, misy izany) amin'ny mpamboly azy. Na izany na tsy izany, mila alona sur'eau adiny iray farafahakeliny ny anandrano satria hanina manta. Raha tsy matinao lolo dia aza asiana anandrano mihintsy. 
• Mampangotraka rano dia alefa ao ny haricot vert sy ny karaoty voavaofy sy voatetika. Avela kely ho masamasaka saingy tsy atao malemy be. 
• Mandritra izay dia manao vinaigrette izay mila alona elaela mba ho "masaka" ny tongolo.
• Andrahoina ho masaka koa ny atody.
• Samy afaka manao izay "présentation" mety aminy ny tsirairay. Ny ahy teto nasiana vinaigrette ny legioma rehetra dia notetehina mizara efatra ny atody, natao fisaka ny voatabia dia napetrapetraka hanome hendrika tsotsotra azy teo.

Mazotoa homàna
Mandra-piresaka tompoko

Goûter#003: Ovy endasina amin'ny fomba hafakely

Salama tompoko,

Asa ny anareo fa ho ahy dia ady sy tolona ny fitadiavana goûter hoan'ny ankizy. Tia zavatra miovaova izy ireo ka mila mamorona foana mba hanaitra azy. Ny biscuits sns hita eny antsena moa amin'izao fotoana izao efa tsy hay intsony izay akora simika ao anatiny ka aleo manao goûter vita ato an-trano. Androany ary dia ovy no nokarakaraina. Efa mahazatra azy ireo ny frite ka ity fomba iray zaraiko aminareo ity indray no nandramana.

Zavatra ilaina:

• Ovy araka izay habetsany mety aminao
• Lafarinina kely
• Sira
• Menaka
• Mayonnaise na ketchup

Ny fomba fikarakarana azy:

Sasàna hadio ny ovy dia voasana. Averina sasana dia kikisana toy ireny mikiki karaoty atao lasary ireny. Teto dia tamin'ilay lavaka lehibebe no nikikisana azy. Rehefa izay dia asiana lafarinina kely mba hampitambatra azy. Asiana sira ihany koa. Mila mifangaro tsara ireo rehetra ireo. Rehefa izay dia hafanaina anaty lapoaly ny menaka. Alaina amin'ny sotro ilay fangaro natao teo ka apetrapetraka ao anaty menaka. Atao boribory na izay hendriny itiavanao azy fa aleo fisaka amin'izay masaka tsara ny ao anatiny. Handrasana ho mendy toy ireny frite ireny dia vita.Aroso miaraka amina mayonnaise na ketchup. Tena tian'ny ankizy ilay izy ary nankafizin'ny lehibe ihany koa.

Mazotoa homàna
Mandra-piresaka tompoko

Goûter#002: Mangahazo maina

Salama tompoko,

Sakafo tena malagasy no hozaraiko aminareo androany. Tsy inona izany fa ny mangahazo maina. Ny olona mampiasa vatana be no tena mpihinana azy ity matetika satria mateza an-kibo. Na izany aza, tsy manakana ny hafa tsy hihinana azy akory izany. Mila mitandrina fotsiny amin'ny fatrany satria saro-devonina izy ity ka mahamasina aty raha be loatra. Ny mangahazo maina andrahoina amin'ny vilany gasy sy afo kitay hono no tena matsiro. Satria moa tsy manana kitay aho dia gaz no nandrahoana azy. Ary mba hitsitsiana ny angovo dia nampiasa cocotte minute ihany koa. Fa alohan'ny hanidina azy ao anaty vilany sy handrahoana azy dia mila fikarakarana kely ny mangahazo maina.

Mangahazo maina araka izay isany mety aminao ary no alaina. Tetehina dia alona rano mandritra ny alina sy ny maraina tontolo. Atao difotra tsara. Rehefa izay dia alefa ao anaty vilany ka asiana rano mandifotra azy. Tsy mbola hidina aloha ny cocote minute fa handrasana hangotraka dia ariana iny ranony voalohany iny. Soloina ny rano, atao be rano. Hidina amin'izay ny vilany. Rehefa manomboka misioka ilay sopape amin'ny sarom-bilàny dia ahena ny afo ka avela hiketrika eo ny mangahazo maina. Rehefa afaka adiny iray any dia afaka sokafana ny vilany hijerena ny leminy. Raha toa mbola misy fotsy ny atiny dia mbola manta izay. Rehefa volo-tany (marron) ny nofon'ny mangahazo maina vao masaka. Somary miforetaka izy rehefa masaka ka izay no mahatsara ilay rano be (mba tsy hiraikitra ny ao ambany) Tsy dia misy fikarakarana manokana fa asiana siramamy dia aroso ny mpianakavy.

Mahalala mangahazo maina ve ianao? Efa nihinana? Tia ve?

Mazotoa homàna
Mandra-piresaka tompoko

Goûter#001: cake natao tamin'ny lasitra gasy

Salama tompoko

Ireny lasitra gasy, vita amin'ny fanitso ireny foana no nanaovan'i Neninay mofomamy taloha. Taty aoriana aho vao nahita lasitra vita "vazaha" tsara hedrika be izy ireny ka vao mivoaka ny lafaoro dia henon'ny maso ny tsiron'ny sakafo ao anatiny. Androany dia niverina amin'ny lasitra gasy aho. Asa hoe nahoana? Lasitra cake no novidiana 2.000ar saingy tsy tena cake no tiana natao fa madeleine satria io no tena malemy mety hoan'ny ankizy. Ny madeleine anefa kely loatra fa ny cake mba azo tetehina araka izay ampy ny zaza ataony goûter any am-pianarana. Na dia tia misakafo aza aho (ary lasa tia manao lakozia koa nohon'ny fitiavan'ny vadiko manao lakozia) dia tsy manana mizana handanjana akora fa dia mbola anjoanjo aloha hatreto. Na izany aza miezaka manaraka ireo lanja voalazan'ny recette mba hampivoaka tsara ny sakafo. Toy izao ary ny nanaovana ity madeleine mihendrika cake ity.

Ny zavatra ilaina

• Lafarinina 200gr
• Dibera 100gr
• Ronono 50gr (iray kaopy kelikely)
• Siramamy (izay mahamamy azy)
• Atody 3
• Levure 10gr 

Ny fikarakarana azy


Atsonika anaty vilany ny dibera ka eo ambony afo malefaka no hanaovana azy mba tsy ho may. Rehefa mitsonika dia vonoina ny afo. Afangaro anaty vilia jobo ny atody sy ny siramamy dia kapohina mandra-pahafotsy azy. Arotsaka ao ny ronono 40gr. Raha te hampiasa hanitra toy ny lavanila na fleur d'oranger ianao dia eto no hanampiana azy ka kely ihany dia ampy. Afangaro tsara ireo rehetra ireo dia arotsaka ny lafarinina, ny levure, ny dibera ary ny ambina ronono. Rehefa mifangaro tsara dia avelao hipetraka mandritra ny fahefakadiny.

Mila osorana dibera ny lasitra alohan'ny handrarahana ilay fangaro amin'izay tsy miraikitra rehefa esorina. Hafanao 240° ny lafaoro dia alefao ao ilay lasitra. Aza sokafana foana ny lafaoro mba tsy hivoaka ny hafanàna. Rehefa afaka 5 minitra dia ampidino 200° ny hafanana ary avelao ho masaka ao mandritra ny 10min. Mila jerena raha masaka tsara ny ao anatiny. Mba ahalalàna izay dia tsatoy antsy ny mofomamy. Esory ilay antsy ka raha tsy misy manaraka intsony fa madio tsara dia masaka izy izay. Raha tianao ho menamena kokoa ny mofomamy dia afaka avela elaela kokoa ao anaty lafaoro.


Dia vita sahady ny mofomamitsika natao tamin'ny lasitra gasy.

Mazotoa homàna
Mandra-piresaka tompoko